2016-04-21

Azərbaycanda yaşayan dini konfessiyaların rəhbərləri dünya ictimaiyyətinə müraciət ünvanlayıblar

Müraciətdə deyilir: “Sizlərə Vətənimiz Azərbaycanda, Azərbaycan-Ermənistan qoşunlarının təmas xəttində baş verən təxribatlarla bağlı narahatlığımızı bölüşmək niyyəti ilə müraciət edirik. Bu, bizim din xadimi olaraq Yaradan və vətəndaş olaraq Vətən qarşısında borcumuzdur.

Dünyanı məhvərindən çıxmağa qoymayan ümumi mənəvi dəyərlərə istinad edən biz, din xadimləri bütün dünyada hər zaman sülh və anlaşma tərəfdarı kimi çıxış edirik. Yaradanın bizlərə əmanət etdiyi insan həyatının rifah və tərəqqisi üçün sülhün, ədalətin mövcudluğu mühüm şərtdir. Azərbaycanda yaşayan müxtəlif dini konfessiyaların rəhbərləri olaraq biz Ermənistan-Azərbaycan, Dağlıq Qarabağ münaqişəsi ilə bağlı son hadisələrə dair fikirlərimizi məhz ədalətli sülhün bərqərar olması niyyəti ilə dünya ictimaiyyətinin diqqətinə çatdırırıq.

Tarixən müharibələr işğalçı və azadlıq uğrunda olmaqla iki qismə bölünür və gec-tez ədalətli tərəf qalib gəlir. Hazırda bir tərəfdə tolerant, xoşməramlı, multikultural, rifah yolunda addımlayan, öz gücünə güvənən Azərbaycan, digər tərəfdə monoetnik, təcavüzkar siyasətini davam etdirən Ermənistan. Dünya birliyinin aparıcı dövlətlərinin, nüfuzlu beynəlxalq təşkilatların uzun illər boyunca problemin sülh yolu ilə həlli istiqamətində səyləri əfsuslar olsun ki, heç bir nəticə vermir. Beynəlxalq hüququn tələbləri Ermənistan tərəfdən yerinə yetirilmir. Dünyanın işğalçı və işğala məruz qalan tərəfə bərabər yanaşması, bəzən qərəzli, bəzən qüsurlu qərarların verilməsi, Xocalı soyqırımını törədənlərin qınanmaması, atəşkəs rejiminin pozulmasına etinasızlıq, hərbçilərimizin öz torpaqlarında snayper güllələrinə tuş gəlməsi, mülki əhalinin mütəmadi gülləbaran edilməsi, vandalizm aktlarının sükutla qarşılanması, münaqişənin real həll edilməsi əvəzinə dondurulması - bütün bunlar Qarabağ münaqişəsinin bölgədə hər an alovlana biləcək ocaq kimi nəzərdən keçirilməsinə əsas verir.

Son günlər Ermənistan-Azərbaycan qoşunlarının təmas xəttində erməni tərəfinin təxribatlara əl atması Ermənistanın işğalçı niyyətlərini bir daha sübut etdi. Münaqişənin sülh yolu ilə həllinə üstünlük verən, günahsız qurbanların sayının artmasını istəməyən Azərbaycan tərəfi əvvəlcə birtərəfli qaydada atəşkəs elan etdi. Hazırda ümumi atəşkəs haqda razılaşma əldə olunsa da, qarşı tərəfdən mütəmadi şəkildə pozulmaqdadır.

Dünya, o cümlədən ermənilərin özləri Qarabağın Azərbaycan torpağı olduğunu gözəl bilir. Bütün beynəlxalq sənədlərdə Azərbaycanın ərazi bütövlüyü tanınır, “Dağlıq Qarabağ respublikası” adlandırılan qondarma qurum heç kəs tərəfindən qəbul edilmir, nəticə etibarilə, işğal altında olan ərazilər nəzarətsiz, istənilən qanunsuz əməllər üçün əlverişli məkandır. Separatçı, terrorçu rejimin müdafiəsini məhz Ermənistan həyata keçirir.

Müharibə hər zaman insan itkisi ilə müşayiət olunur. Lakin bir məsələ nəzərdən qaçırılmamalıdır ki, haqq yolunda mücadilə aparan, Vətən torpağı uğrunda şəhid olanlar, Peygəmbər Mühəmməd Salavatullahın mübarək hədisində buyurulduğu kimi, imanın, mənəviyyatın ən yüksək zirvəsinə ucalmışlardır və cənnətməkandırlar. Erməni əsgərləri isə qəsbkar rejim yolunda ölürlər.

Dövlət başçımız, Ali Baş Komandan İlham Əliyevin düzgün vurğuladığı kimi, erməni əsgərləri ölmək istəmirlərsə, bizim torpaqlarımızı tərk etməlidirlər. Azərbaycan xalqının səbir kasası dolmuşdur, onilliklərlə davam edən işğal faktına son qoymaq üçün vətənpərvər, yüksək peşəkar nizami Azərbaycan ordusu hər an Ali Baş Komandanın əmrinə müntəzirdir. Azərbaycanın dövlət başçısının sülhpərvər siyasətini dəstəkləyən Azərbaycan xalqı münaqişənin dondurulmuş halda qalmasını istəmir, Azərbaycanın ərazi bütövlüyü çərçivəsində ədalətli sülhün bərqərarını istəyir. Torpaqlarını işğaldan azad etmək Azərbaycan xalqının suveren hüququdur. Beynəlxalq hüquq bunu təmin edə bilməzsə, Azərbaycan xalqı Ali Baş Komandanının rəhbərliyi ilə ədaləti bərpa etməyə qadirdir. Erməni xalqı və dövləti bu həqiqəti nə qədər tez qəbul edərsə, özləri mübtəla olduqları müsibətdən daha tez xilas ola bilər.

Biz, Azərbaycanın din xadimləri dindarlarımızın iradəsini ifadə edərək üzümüzü dünya ictimaiyyətinə tutur, Ermənistan-Azərbaycan, Dağlıq Qarabağ münaqişəsinin beynəlxalq hüquq çərçivəsində ədalətli həllində, BMT-nin qəbul etdiyi 4 məlum qətnamənin müddəalarının tələblərinin yerinə yetirilməsində təkid etməyə çağırırıq. Bu münaqişənin ədalətli şəkildə, sülh yolu ilə həlli dünyada sülhün, əmniyyətin bərqərar olmasına töhfə olmaqla yanaşı, beynəlxalq hüquqa inam və etimadı artırmış olar. Əks halda, ehtiyat edirik ki, münaqişə daha geniş miqyas ala bilər. Azərbaycan dindarları dövlət başçımızın münaqişənin həlli istiqamətində atdığı addımları dəstəkləyir, problemin sülh yolu ilə həlli üçün dualar etməklə yanaşı, işğalçıların qeyd-şərtsiz ərazilərimizdən çıxmasını tələb edirlər.

Vətənimizin ərazi bütövlüyü uğrunda döyüşlərdə şəhid olmuş dəyərli həmvətənlərimizin ruhu qarşısında ehtiramla baş əyir, onların ailələrinə, yaxınlarına, bütün Azərbaycan xalqına dərin hüznlə başsağlıqlarımızı bildirir, Uca Allahdan şəhidlərə rəhmət, yaralılara tezliklə şəfa tapmalarını diləyirik.

Qoy Uca Yaradan torpaqlarımızda ədalətin zəfər çalmasında bizə yardımçı olsun! AMİN”.

Müraciəti Qafqaz Müsəlmanları İdarəsinin sədri şeyxülislam Allahşükür Paşazadə, Bakı və Azərbaycan arxiyepiskopu Aleksandr, Azərbaycandakı Dağ yəhudiləri icmasının rəhbəri Milix Yevdayev, Azərbaycandakı Avropa yəhudiləri icmasının sədri Gennadi Zelmanoviç imzalayıblar.

Arxiv üzrə axtarış